I-ANC Women’s League ifuna uSihlalo weSizwe we-ANC, uGwede Mantashe, axolise esidlangalaleni ngamazwi awathethileyo ephendula umbuzo wentatheli malunga nezityholo zokufuna ukwabelana ngesondo ukuze kufumaneke imisebenzi.
UMantashe uthe: “Into yokucela isibumbu, ungandifaki kuyo. Elowo uyazicelela isibumbu sakhe emntwini adibene naye. Into yokucela isibumbu asiyonto ye-ANC.”
Ngenxa yala mazwi, i-ANC Women’s League ikhuphe ingxelo ngeCawa, umhla we-18 kweyeDwarha ka-2026. Lo mbutho uthe uphazamiseke kakhulu ngamazwi kaMantashe, uwachaza njengangafanelekanga.
Ifuna kuthathwe amanyathelo
I-ANC Women’s League ithi uMantashe, njengenkokeli ephezulu ye-ANC, kufuneka ahloniphe isidima sabantu kwaye akhuthaze ukulingana ngokwesini.
Ngaphezu koko, lo mbutho ufuna uMantashe acele uxolo kwintatheli nakuluntu ngokubanzi. Ukwafuna ukuba iinkokeli ze-ANC zimkhalimele kwaye zithathe amanyathelo oluleko ngakuye.
I-ANC Women’s League ikwacacise ukuba ubudala bukaMantashe abufanele kusetyenziswa njengesizathu sokuthethelela amazwi akhe.
Endaweni yoko, lo mbutho uthi iinkokeli ezindala kufuneka zikhokele ngokunika iingcebiso nobulumko, ingakumbi kwimiba echaphazela abasetyhini.
Ekugqibeleni, lo mbutho ucele uxolo kwintatheli yeNewsroom Afrika ngenxa yamazwi kaMantashe.
